مديح فى الأنبا دوماديوس
أنبا دوماديوس يا فخرنا ... تركت الأرض و تركتنا
رحت السما ، وسبقتنا ... صلى عشانا كلنا
... عشت معانا بكل حنان ... تزرع حب فى كل مكان
سكنت قلوبنا والوجدان ... ونورت حياتنا كلنا
عشت بتخدم كل الناس ... قلبك كله غيره وحماس
هدفك تهدى للخلاص ... ناس كتير كده زينا
يا ما خدمت ويا ما قاسيت ... يا ما تعبت ويا ما ضحيت
وياما أسست ، وياما بنيت ... لأجل ما ترفع شأننا
عشت بتخدم عمانوئيل ... شفت الصعب ودست الويل
وياما تعبت نهار مع ليل ... عشان صالحنا كلنا
علشان خدمة الفتيات ... أنشأت بيوت للطالبات
وأرتاحت اسر بالمئات ... وريحت قلوبنا كلنا
وكمان فى مدارس الأحد ... ذهبت الى كل أحد
وخدمت كتير من غير عدد ... علشان تربحنا كلنا
حتى البابا شنودة حبيبنا ... شهد لك أنت يا سيدنا
على ايدك أحنا أتعلمنا ... ونجحنا بعلمك كلنا
كرست حياتك للمسيح ... أكملت جهادك ، استريح
وأقبل من شعبك المديح ... وصلى عشانا كلنا
أولادك كهنة أو خدام ... وشمامسة وشعب عايش فى سلام
بيقولوا لك بأحلى كلام ... صلى عشانا كلنا
أحنا شعبك يا حبيبنا نسير ... فى طريقك من غير تقصير
وبنصرخ يا سيدنا كتير ... صلى عشانا كلنا
اذكرنا يا حبيبنا الغالى ... ياللى سهرت عشانا ليالى
ونجمك فى السما بيلالى ... صلى عشانا كلنا
اذكرنا يا حبيبنا القديس ... ياللى حياتك صلاة وتقديس
بصلاتك نهرب من أبليس ... صلى عشانا كلنا
اذكرنا يا حبيبنا فى الفردوس ... مع الكنيسة مع العروس
ولأجل خلاص كل النفوس ... صلى عشانا كلنا
ليست هناك تعليقات:
إرسال تعليق